每一次去澳門都必定要買嚟食，通常我都會去餅店買葡撻，而佢嘅麵包,曲奇同埋蛋糕都非常出色,尤其白蘭地雜果蛋糕，我都好鍾意食！
每次都買一大堆返香港，慢慢食🤭
今次去澳門行到好攰，而且天氣炎熱，所以決定去佢餅店轉彎嘅咖啡店，可以坐低，慢慢嘆，休息一下。
安德魯蛋撻 $11
蛋撻熱辣辣送到，焗到金黃色，未食已經聞到濃郁嘅奶油香味。撻皮一層疊一層，非常酥脆～
蛋漿表面燒到微燶，有焦糖味道，蛋漿質地順滑，入口即溶，充滿蛋奶香，甜度適中，超級無敵正！
新鮮薄荷茶 $24
食咗幾隻蛋撻，當然要飲杯熱茶解膩啦！
我哋叫咗一壺熱嘅薄荷茶，餐廳用上新鮮嘅薄荷葉配蜜糖，蜜糖按自己需要落。
打開個蓋，深深聞一聞，成個人好精神，好舒服，茶香微甘，好清新，亦都幫助消滯，非常好嘅選擇。
