牛記咖喱美食

營業中

休息中

其中一個到訪澳門嘅目的地就係呢間牛記美食。上網見過好評如潮，特地去試下。聽講最岀名嘅係蟹皇撈麵，所以先叫一碟，另外作為愛蟹之人，我地仲叫左水蟹粥，一蟹二食！除左蟹皇，薑絲同麵，底部仲有一層蟹油。將全部材料混合就可以食啦！一食落去，最先食到蟹嘅鮮味，麵保持彈牙，而蟹油保持個麵唔會愈食愈乾，亦增添多一份層次，每啖都非常邪惡。蟹皇嘅份量夠撈哂成個麵，食到尾都唔會唔夠味。麵嘅份量唔算好多，下午茶會啱啱好，午餐就略嫌不夠，我地亦覺得香港食到呢種味道嘅機會唔多，所以，encore一碟蟹黃撈麵！而水蟹粥就完全係另一種蟹嘅風格。首先粥係清淡嘅，剛好可以平衡撈麵嘅濃郁。窩粥仲有足足一隻蟹，每啖粥都有絲絲蟹嘅味道，不錯呢！一濃一淡，各有千秋。除此之外，我地仲叫左一碟腐乳通菜。上菜嘅時候有驚喜，因為雖然餐牌上寫住腐乳通菜，以為係就咁悼熟，但其實係腐乳炒通菜！仲要好大碟，不過因為門口人潮眾多，衝衝食完無影相。總括嚟講，味道十分有驚喜，愛蟹之人必定要去澳門試下啊！