六記粥麵

營業中

休息中

今時今日，要搵正宗嘅水蟹粥，真係難過登天！就算過大海嚟到攞咗米之蓮嘅六記，今晚食到嘅所謂水蟹粥，其實只不過係普通嘅青蟹粥，兩隻青蟹一啲都唔「水」。真正嘅水蟹，啲肉係非常削，差不多食唔到蟹肉嘅纖維，但就有好多蟹汁非常之鮮甜，用嚟煮粥可以將鮮甜味完全溶入喺整煲粥裏面。因此，食水蟹粥並唔係為咗食蟹肉，而係要將非常鮮美嘅蟹汁煮出好鮮甜嘅粥！可惜好多食店，只會用普通嘅青蟹，根本未能達到水蟹嘅鮮甜度。原因可能係希望食客食到蟹肉而感覺抵番。。。炒蜆嘅豉椒味道唔錯，但蜆肉嘅質地就麻麻嘞，咬落比較韌，有兩個原因：一、可能啲蜆係雪藏貨；二、阿姐炒蜆嘅時間過長過哂火，所以蜆肉變得韌。蝦子撈麵嘅麵底係竹昇麵，非常爽口彈牙，但蛋味唔算濃，而且有一個缺點，就係碟麵上枱嘅時候只係䁔暖地，好似攤凍咗先上枱咁，我估可能同過冷河有關。蝦子嘅份量非常多，鋪滿晒麵面，但係味道比較燶唔可以叫做香，好似吵得過咗火咁。整體上味道只係一般。可能期望太大，失望而回。