360°旋轉餐廳

營業中

休息中

之前諗住嚟澳門旅遊塔觀光，另一半就提議可以試吓間旋轉餐廳自助餐。上網訂位先發覺原來午餐好抵，兩個人都唔使$500。由於我哋係星期一去食午餐，所以唔多人，因此坐到窗邊位。雖然個旋轉餐廳係轉得好慢，其實成個午市都冇轉到兩個圈 但係如果有啲人係容易暈嘅話，我建議你唔好坐倒頭位。嗰日能見度同天色都好好，基本上成個氹仔澳門橫琴嘅景色都一覽無遺，連港珠澳大橋都可以望到。去到某個位，甚至可以同玩笨豬跳嘅人，只係相隔咗一塊玻璃，望住佢哋鼓起勇氣由1000尺嘅地方直奔地面，都幾震撼。我要承認，我嗰日其實專注欣賞景色多過食嘢。我個人覺得啲食物都係同其他自助餐餐廳差唔多，有海鮮、魚生、熱盤、甜品、生果等等。我個人就覺得啲海鮮唔算太新鮮，不過當然呢個價錢就唔應該有太高要求，主要其實都係食個景嘅啫。午市限時90分鐘，會有少少趕，所以千祈唔好遲到。