【英國城澳門新主題餐廳】華麗英倫風裝潢推經典英式料理+二人下午茶

澳門新馬路最近有間英式主題餐廳英國城新登場，佔地3層，裝修融合國會內廷同英國庭院設計，以深綠色為主調，無論廂座定係獨立房間都帶點復古感覺。餐廳主打多款英國經典菜餚，如威靈頓牛柳、炸魚薯條，又供應英式下午茶，嚟享用正餐、high tea或午後小酌都得。

前菜、小食推介

正式開餐前，先品嚐呢道開胃冷盤啦～煙三文魚配牛油果下層為澳洲牛油果粒粒，上層則有拌入秘製酸甜醬汁嘅挪威三文魚，配上特製墨汁脆片、食用花作點綴，味道清新，口感層次豐富。

煙三文魚配牛油果，墨汁脆片

英國人氣菜式之一嘅炸魚薯條，呢度亦有供應。魚條裹上特製麵漿，炸衣薄脆香口，魚肉鮮嫩；薯條則選用美國粗薯條。蘸少許他他醬、特製番茄醬或清新青豆醬會更惹味。

炸魚薯條（3條炸魚/小份）

精選海陸空招牌菜

海鮮料理之中，名貴魚類都值得一試，好似法國白鱈魚帶子黑松露野米嘅白鱈魚，係供應量較少嘅魚款，皆因佢生活喺800米以下嘅深海，而且受管制捕撈。魚肉厚實嫩滑，鮮甜且油香十足；沾上香料煎至金黃色，連同以黑松露汁調味嘅加拿大野米、日本帶子等伴菜一齊食，飽肚又有咬口。

法國白鱈魚帶子黑松露野米鮮味十足

至於「陸」方面嘅經典英國菜，不得不提威靈頓牛柳，相傳係英國威靈頓公爵擊敗拿破崙後，開慶功宴時設計嘅菜式。餐廳將約280g上等安格斯牛柳，以大火煎至略帶金黃色後，依次用蘑菇蓉、意大利火腿片、法國頂級酥皮一層層包裹，烤至外酥內嫩。伴以食用花、各式蔬菜，色香味俱全。

威靈頓牛柳切開顏色粉嫩

紅肉菜式之中，蘇格蘭烤羊仔架亦係唔錯嘅選擇，一份有4件羊架，肉量十足。羊架低溫慢煮後，輕煎至外皮呈金黃色，再灑上堅果碎、配以秘製濃汁同多款蔬菜，入口軟嫩，唔會好羶，平時怕羶嘅朋友都可以一試。

蘇格蘭烤羊仔架

倫敦西敏寺烤鷄肉量十足，啱晒一班人開心share～原隻鷄隻用秘製方法浸醃，然後加入新鮮檸檬、多款香草烤焗，外皮香脆，入口清香多肉汁，連鷄胸肉都好軟滑，係餐廳嘅人氣菜式之一。

倫敦西敏寺烤鷄配上薯角、車厘茄、焗蒜頭

英式下午茶二人套餐

想試多幾款甜品嘅話，不妨約埋朋友試英式下午茶二人套餐，鹹甜點會按是日款式作出微調，有時重可以轉換部分款式，增加一點自由度。其中「T2英式休閒下午茶」，包括英式女王司康鬆餅、蘇格蘭迷你牧羊批、馬卡龍、伯爵茶法式千層蛋糕、自選法式千層蛋糕同英式紅茶；你亦可以用1件千層蛋糕，轉水果塔或牛油果三文魚等鹹甜點。