368小食魚湯粉
澳門都好多乜乜乜緬甸美食，而打正旗號叫自己做乜乜魚湯粉就唔係好多，368就係其一。呢度魚湯粉分兩個size，普通版賣$24，加大版$32，算係抵食。為食貓食魚湯粉會飲晒啲湯，次次食普通版都夠飽，所以到依家都唔知加大版有幾大。
呢度魚湯粉好足料同大碗，可選配豆餅、炸洋蔥、炸莆瓜、油炸鬼、魚餅其中一款，加多款就加$8，睇相就知配料量都好多。
魚湯入面都有唔少魚肉，而且湯頭濃度OK，唔會覺得自己飲緊水；最重要係質地都夠濃唔會稀。今次為食貓就揀咗配炸莆瓜，瓜身爽脆，配埋炸粉就係脆上加脆；仲要炸到啱啱好，又香又酥，吸埋湯食仲精彩。
QQ食真香麵食咖啡室
呢間舖都幾多嘢賣，緬甸嘢泰國嘢都有，選擇豐富。不過為食貓嚟親都係食魚湯粉，因為都係好好味。呢度又係好抵食，一碗$22，但就只有一個size。不過係正常size，絕對夠飽。
魚湯粉會配豆餅，而其實為食貓平時真係唔係咁中意食豆餅，但呢度個豆餅又做得出奇地好食喎！塊豆餅會同碗粉同一個碗上枱，但就已經分開五、六小塊，都幾多㗎。為食貓試過某啲舖塊豆餅啲豆硬到好似石春咁，但QQ食真香呢啲係爽口，一咬就開，而且塊餅都炸得好香。
湯就食到好豐富香料味，而且有少少辣。同樣，湯質夠濃味夠香，好醒神。粉就幼身啲又較軟，各有所好。
小休咖啡
本身成個setting都係茶記樣，有咖啡奶茶，食物就主要係緬甸式。以前為食貓都嚟食過好多次，出品都唔錯。點知，白馬王子蔡楓華原來真係好有先見。
相隔咗半年再去，加價到$28都算，澳門而家食嘢郁啲都要咁上下價錢，但個質素同為食貓之前去真係相差咗好多。小休本身碗麵都係細啲㗎啦，為食貓去食親都唔係好夠嘅，但以前質素叫唔錯。今次再去，一上枱，啲湯水還水、料還料，一個字「稀」囉。飲落都還好嘅，有少少蝦乾味，又有少少辣，都算開胃嘅。但啲粉就……應該咁講，幾方便老人家食嘅。
文：Hungry Cat
編輯：macau@openrice.com
隨時接收最新資訊
讚好OpenRice專頁！
關鍵字
緬甸
小食
魚湯粉
豆餅
複製到剪貼簿