Plato Cafe & Bistro (吳松街)

今晚約咗朋友喺佐敦食飯，突然間覺得好耐冇食西餐，於是同朋友傾完之後就決定嚟呢一間餐廳，之前去過mikiki嗰間分店都覺得幾好食，今次就試吓佐敦呢間，結果都覺得質素幾高，服務態度好之餘，環境又舒服，嘢食都幾好味。今日要咗個精選二人套餐，後來仲發現6月份有兩個會員優惠，包括萬事夠話就一定會送一客小食，同埋25cl Hoegaarden有買一送一講返嘢食先，個煙三文魚caesar salad好新鮮好清爽，呢啲咁熱嘅天氣真係覺得好正，今日嘅是日餐湯係我最鍾意嘅洋蔥湯，入口嗰種洋蔥嘅甜味真係一試難忘。北海道帶子松露惹菌意大利粉，一上枱已經聞到好香，意大利粉嘅軟硬度亦都調節得剛剛好，當然啲帶子都好新鮮啦，另外就係個炭燒澳洲肉眼牛扒叫咗三成熟，份量都唔細，而呢個價錢都幾抵，甜品方面就要咗朱古力雪糕杯同埋芝士蛋糕，唔會太甜，食落剛剛好，飲品就試咗佢個冰果茶，好有水果香味，好解渴！