CENA

營業中

休息中

玩完SUP，拖着疲倦嘅身軀去覓食，極需要補充體力。經過西貢小巴總站一直直行，就發現Cena。Cena 室內室外都有雅座，仲有啲外籍人士帶埋好可愛嘅狗仔嚟，好啱西貢呢種休閒外國feel。一行三人點咗古巴手撕豬肉粟米軟餅、海鮮意大利飯同Cena’s 煙燻烤雞披薩。Cena’s 煙燻烤雞披薩驚為天人，唔好計本身肚餓，我哋三個一致都覺得食物質素超班。同想像中嘅薄批唔同，佢係用咗雙層嘅批底，中間夾雜左芝士。芝士層好柔軟，真正食到外脆內院嘅Pizza。食得好滿足。除咗芝士味同煙燻雞嘅淡淡BBQ醬之外，批面嘅酸忌廉更加嘅係錦上添花，令到個批唔會膩，味道平衡得好好。雖然有寫到有泰式辣醬，但係冇咩辣味，所以唔食辣嘅人都冇問題。古巴手撕豬肉粟米軟餅有幾個層次，有莎莎醬、手撕豬肉同牛油果。手撕豬肉以大蒜、秘製醬、橙汁所醃，味道偏濃厚，有啲蓋咗莎莎醬。整體都好惹味。海鮮意大利飯調味剛剛好，蕃茄醬唔會過酸。飯唔伯過稠，鐘意呢種飯嘅濕潤度。希望快啲再嚟西貢玩水，再嚟食。