Plato Cafe & Bistro (Mikiki)

聽過呢間cafe應該好多年，但從來就無衝勁去試，就算經常去屋企附近的商場有分店，經過左過百次都諗唔起要去試下，不過，遲到都好過無到，都叫試到。上星期放工，放棄左最愛嘅壽司郎，試左呢間幾出名嘅cafe ，Plato。食完都真係幾驚喜，原來都好旺好受歡迎，就算唔係佐敦係去新蒲崗呢間分店，你見都全滿，相信水準唔會差得去邊。煙三文魚火龍果沙律，全部野都好新鮮，健康人士必點，不過佢沙律個汁好食到會好開胃。前菜食多個墨西哥芝士焗粟米片，滿滿牛油果醬又夠熱，多人食絕對應該分享下。燒黃油春雞，呢個同出面貴餐廳賣緊幾百蚊隻嘅當然不能同日而語，但老實百幾蚊仲有咁嘅質素同味道，超值。明太子虎蝦意大利粉，呢個未必個個可以接受重口味嘅明太子味，其實因為佢哋慷慨，所以明子味好重好濃，每條意粉都掛汁。記得如果你叫晚餐，值得加$38可以有個法式蟹肉龍蝦湯，有好多嘅龍蝦肉，而家湯夠濃，飲得出煲得有誠意，不過當日嘅是日餐湯南瓜湯都唔錯。整體嘅質素都幾好，三個人食咁多嘢都係四百幾蚊，新蒲崗嘅街坊值得支持，如果下次去佐敦分店呀，都可以去試吓。