寿司の神 (已結業)

食omakase點都要食個蒸蛋先既！今次既蒸蛋係用左虎蝦，虎蝦鮮甜爽口，幾大隻，蒸蛋幼滑鮮甜。我同友人一人叫左一隻兵庫縣真蠔，日本蠔一向都係我既最愛，生蠔個泡野會比較實淨，海水味唔重反而清甜，加埋少少醬油更帶出新鮮既味道。刺身方面就食左油甘魚同響螺，油甘魚加埋醬油既風味同平時食好唔同但又幾夾；而響螺加左柚子皮同黑椒，感覺爽口而refreshing, 呢個好味！ 壽司方面，深海池魚肉質肥美；目仁奈肉質就比較爽口，好似食緊貝殼類咁；新鮮鯖魚油脂豐富，而且好香魚油味；赤貝厚肉爽口；小拖羅係我嘅最愛，微微消過更能夠帶出魚油，令到冇咁油膩；鰹魚都唔錯；海膽一啖食晒而且冇腥味，簡直係人間極品；帶子都係厚身啖啖肉都幾好。食完咁多生冷野，最好就用返個熱辣辣嘅洋蔥湯，勁濃而且食到洋蔥肉，好似飲緊西湯咁！甜品方面係一個抹茶茶豆腐布甸（?），豆腐勁滑同抹茶醬好夾，中間仲有一粒用糖煮過嘅黑豆，真係勁好味囉！