HOLA

營業中

休息中

今日7月1號係香港一個特別嘅日子，今朝比中學同學晨早流流嘈醒話要去食早餐，應該都係暢談政治局勢發展。既然今日揸車就去，要揸車去到嘅地方食早餐，要諗就諗到新田嘅天空之城。因為天空之城入邊有一間好好食嘅西餐廳。嗰度充滿英倫風格，而且好有特色，仲可以帶啲心愛嘅小狗狗去餐廳度食早餐。呢度啲炒滑蛋同埋意粉都好好食，雖然叫白咖啡要加成8蚊雞，但係都好值得㗎！佢唔似係舊街場嘅白咖啡咁難飲，好有啡啡味，入口舒服，又可以慢慢坐等時間過。朝早九點幾食早餐都食到成十一點幾，完全係唔會有一個好急速嘅城市節奏，嚟到呢度，可以慢慢坐，慢慢傾偈，而且啲嘢又好食，雖然上菜速度唔算快，但早餐都會係熱辣辣，會熱到辣口。因為太耐冇嚟到呢度食早餐，佢而家係新設左港式茶餐廳嘅風味。好似我今次叫嘅蕃茄湯長通粉，配香腸滑蛋三文治。佢嘅蕃茄湯底係好新鮮，唔會落茄膏，所以你可以放心咁飲埋啲湯。而且個三文治最特別係佢個麵包會見到卜卜脆，滑蛋好好食！呢間係一間好寫意嘅英倫風格餐廳揸車嘅朋友可以一試。