8
店員開鍋好有儀式感，先鋪滿蔬菜，再用牛胸腹輕輕煎香，倒入壽喜燒汁煮成湯底。湯汁香甜濃稠，帶微微醬油焦香，唔會死甜。
先講肉類
最受歡迎的主角當然是日本宮崎縣A5和牛，甫出場仲要係用金色碟同衣架掛住上檯，打卡able之餘，肉質真係無得輸。油花細密如霜，入口脂香澎湃，真係融化喺舌尖。另外期間限定嘅北海道十勝國產牛都唔弱，肉味濃厚帶嚼勁。其他肉類都交足功課：美國肩胛肉軟嫩多汁、加拿大牛板腱爽口唔韌、美國封門柳牛味突出、一口和牛脂甘豐腴，仲有牛小排、羊卷肉、西班牙栗飼豬梅肉同花雕酒雞件，全部質素對得住價錢。
海鮮及火鍋配料
海蝦爽彈鮮甜，青口同蜆都冇雪藏味。手工蝦滑值得encore，彈牙食到蝦粒。蔬菜推薦台灣直送水蓮菜，爽脆清甜，平衡返肉嘅油膩感。餃類亦有多款，有阿在伯高麗菜豬肉餃、韭菜豬肉水餃、蛋餃等。
台式小食
說到台灣野食，呢度有超多款台式小食，我就一定要點麻辣鴨血來食，滑溜入味，麻香溫柔唔嗆喉。滷水豬耳爽脆鹹香，香煎墨魚餅外脆內彈，炸花枝丸同黃金魚蛋都係香口惹味。鹽酥雞、皮蛋豆腐、牛三寶、宜蘭蔥餡餅……太多款，好多我都想食但真係食唔晒了。
玩DIY奶茶+Smoothie機
除咗罐裝飲品，最過癮係有自調奶茶區，茶底任揀。仲有部Smoothie機即打生果冰沙，果味清新解膩。
$399有A5和牛任食，仲要包埋咁多款質素唔錯嘅肉類、海鮮同台式小食，喺尖沙咀地段來講性價比高。抵食！
