影片
更多
2016-09-26
1455 瀏覽
九龍城美食真係多蘿蘿, 最出名離不開都係甜品、泰國野或者打邊爐, 好多時2人世界好少機會食到打邊爐, 但今次比我無意中發現呢間餐廳竟然有打邊爐2人餐, 一於試試睇下值唔值得下次再去先!! 2人餐 $538 包左12款食物, 可以揀自己鐘意既湯底, 套餐包左基本湯底, 但如果想要D有特色就補差額, 第1次試我地都係叫返個最基本的芫茜皮蛋湯底 ^^ 等緊上菜期間見到原來呢度有刺身同海鮮, 海鮮用魚缸養住保證新鮮。 醬料自己加, 飲品另外叫, 待應推介大大枝雪花啤酒都係 $13, 果然無介紹錯, 易入口夠純最緊要夠凍, 飲落一個字<爽>啊。 等左大約10分鐘, 2人餐食物來啦~ WOOW...(我嚇左一跳) 食物竟然用上 HIGH TEA用開的三層架, 頓時覺得成件事好似高級左咁...哈!! 講返2人餐, 包括左不同丸類(牛丸, 蝦丸, 貢丸, 墨魚丸), 餃類(雲吞, 水餃, 魚皮餃), 海鮮(聖子, 青口) 仲有打邊爐主角 牛肉 (手切肥牛, 安格斯牛柳粒, 牛白肉), 最後仲有公仔面或烏東同埋蔬菜藍。 店員好細心地介紹每樣食物放落湯滾的時間, 我急不及待先食牛肉, 店員
九龍城美食真係多蘿蘿, 最出名離不開都係甜品、泰國野或者打邊爐, 好多時2人世界好少機會食到打邊爐, 但今次比我無意中發現呢間餐廳竟然有打邊爐2人餐, 一於試試睇下值唔值得下次再去先!!
2人餐 $538 包左12款食物, 可以揀自己鐘意既湯底, 套餐包左基本湯底, 但如果想要D有特色就補差額, 第1次試我地都係叫返個最基本的芫茜皮蛋湯底 ^^
等緊上菜期間見到原來呢度有刺身同海鮮, 海鮮用魚缸養住保證新鮮。
醬料自己加, 飲品另外叫, 待應推介大大枝雪花啤酒都係 $13, 果然無介紹錯, 易入口夠純最緊要夠凍, 飲落一個字<爽>啊。
等左大約10分鐘, 2人餐食物來啦~ WOOW...(我嚇左一跳) 食物竟然用上 HIGH TEA用開的三層架, 頓時覺得成件事好似高級左咁...哈!!
講返2人餐, 包括左不同丸類(牛丸, 蝦丸, 貢丸, 墨魚丸), 餃類(雲吞, 水餃, 魚皮餃), 海鮮(聖子, 青口) 仲有打邊爐主角 牛肉 (手切肥牛, 安格斯牛柳粒, 牛白肉), 最後仲有公仔面或烏東同埋蔬菜藍。
店員好細心地介紹每樣食物放落湯滾的時間, 我急不及待先食牛肉, 店員話手切肥牛滾到變色即刻食得, 微紅狀態最好味, 果然入口即溶, 好重牛味, 好好味。安格斯牛柳粒可以滾耐少少, 大約十分鐘, 越滾得耐就越好味, 牛柳粒有咬口, 一啖一口。最特別係牛白肉, 店員多番提醒只係滾十幾秒就食得, 牛白肉一落湯度即刻會自動縮少, 入口咬落有少少爽口, 好特別我都係第一次食, 總括呢度D牛肉真係好得, 只可惜2人餐份量就較少, 對於我呢個牛魔王來講, 唔係幾滿足。
雖然牛肉份量唔夠, 但其實仲有好多其他野食我都仲未開動, 好驚喜估唔到其他食物都咁有水準, 丸類全部好彈耳, 仲要大大粒好足料。
雲吞同水鮫有半隻碗咁大隻, 大大隻蝦係入面加埋木耳絲同瘦肉, 好足料, 好好味啊。
聖子又係大大條, 好新鮮, 無沙, 咬落非常鮮甜。
個湯底夠晒味既時候, 就當然要食個日本正宗幼身的稻庭烏東啦, 烏東好滑, 咬下去口感非常滿足, 仲非常飽添。
飽時飽打邊爐又點少得菜呢, 有3款(生菜,西洋菜,小唐菜), 全部好新鮮。當我地以為2人餐食物份量唔算好多, 但原來食到最尾都係會飽到抱住個肚走, 因為種類夠多, 食食下唔覺唔覺其實食左好多, 好飽。好多人打邊爐其實咩都想試, 但平時如果2個人打邊爐一定無可能叫咁多款食物, 呢個餐就滿足到2人打邊爐呢個問題啦, 所以黎緊冬天我同老公終於有個打邊爐選擇既好地方啦。^^
張貼
