百樂門囍宴

營業中

休息中

彩明商場之前開嘅酒樓都係喺三樓，可能位置問題全部都結業，呢間新開嘅百樂門囍宴酒家終於可以避咗呢個位，開設嘅位置前身係一間超級市場。今日做完晒嘢同兩位同事嚟試吓飲下午茶，星期六嚟講攞位算容易，食物味道又唔錯，喺將軍澳區都算唔錯，搵次閒日收工可以試吓晚巿。懷舊春蛋燒賣，呢個點心我覺得周圍都差唔多，肉質食落質素比連鎖外賣點心店好啲，始終係即叫即蒸。陳皮牛肉球，食唔到陳皮味，不過牛肉球都可以，唔會太淋。鮮蝦娥姐粉果，平時對粉果一般嘅我都覺得唔錯，有蝦而且食落比平時嘅少油膩感。蜜汁叉燒包，餡都幾多。鳳凰千層糕，鬆軟嘅馬拉糕加上奶黃香，好味。蘿蔔千絲酥，做得好好，食得到層層酥脆，餡亦做得幾清淡，好味。豆苗鮮蝦腸，每段腸粉都見到有蝦，粒粒飽滿，皮亦幾滑。鹹菜豬肚，呢個一漏再漏單，落單大概45分鐘第一次追單話整緊，第二次係二十分鐘後話無落單，即刻落單，幾分鐘後到，滾住出嚟。我無食到朋友話好味，清曬底咁滯。燒汁珍菌帶子炆米，一般，太乾，同埋得幾粒帶子粒擺一邊。宮廷桂花糕，桂花糕入面加咗粟米粒，口感無豐富咗，甜味軟硬適中。