黑木亭居酒屋 (清風街) (已結業)

天后好多小店都未試過，上次嚟試咗間印度菜，今次就食居酒屋！餐廳服務幾好，會不停主動加熱茶，我係前幾日落大雨嘅夜晚去，竟然都滿座。😳成晚最好食係麻辣燒雞翼，燒到外皮微脆雞肉嫩滑，個醬好惹味，辣得幾爽，好想食多串！👅 唔怪得知見到有blogger因為呢間啲串燒調味而翻兜。厚燒牛舌，好肥美嘅口感，咀嚼嘅時候會滲出好多油。另外清酒煮蜆，份量都算大，蜆肉無沙，湯底飲落明顯有蜆同什菌味。燒翠肉瓜juicy，佢加咗芝士同明太子，賣相好似波板糖，不過我都係鍾意食原汁原味。日本A4吉烈和牛三文治（配海膽、黑松露）每一件都有大粒和牛，但塊麵包好乾😭🥺 扣咗分，可能換另一隻包會好啲，聽講牛肉他他唔錯。整體我覺得串燒抵食啲！飲品個樣好IGable，圖六隻熊仔好cute，叫芒果烏龍熊茶🤣🐻 甜度好低，偏淡，因為我鍾意甜嘢，所以後面有啲洛神花點綴嘅葡萄檸冰啱口味啲。