阿媽話同阿姨食過呢度海鮮好新鮮好味，請我同老豆黎食海鮮喎，嘩！果然晚飯水準幾唔錯，尤其係海鮮。
阿媽話滋補湯水正，叫左黑蒜螺頭燉雞湯，超濃黑蒜味呀！未飲過呢種湯，真係飲完成個人滾起來😂。
酒樓食海鮮必叫，登登登登！上湯澳洲龍蝦伊麵！目測不只半斤重，油泡過龍蝦肉質更香更爽口，師傅仲爆好哂d殼，好易食，差不多全部都唔洗自己再鉗開，伊麵底滲入哂龍蝦同上湯所以鮮味十足好好食。
阿爸最like呢個杭州香醋一口骨，每一口都有醋香，外層脆脆又甜蜜嘅味道，嫩肉口感，開胃又好味。
熱辣辣石鍋上檯乾隆石鍋炒飯，炒兩炒令飯更香更乾身。裡面有帶子、瑤柱、蝦等等，我地專登擺耐d先食，食埋鍋飯帶鮮味嘅飯焦。
黑椒金薯牛仔粒除左有金薯仲有菇，全部切細差不多size一粒粒，黑椒味同少少蜜糖味包住薯仔粒同惹味牛仔肉粒，好好餸飯。
為食嘅我忍唔住再叫隻脆皮燒乳鴿，香噴噴又惹味，飯後食埋紅豆沙，正！
