合時小廚 (裝修中)

金生終於放下心頭大石，工作至9點先嚟食晚飯，咁岩經過呢間小店，舖頭細細，估計食物應該唔會粗製濫造，咁就入去試下啦。為左慶祝一下，今晚就叫個魚翅再加個白飯先，呢個煲仔翅味道都唔錯，料還都幾足，用嚟送飯一流。金蟲草花燉雞腳湯，好清甜潤喉，湯料十足，即刻順返條氣，不錯呢度有咕嚕千層肉同埋咕嚕肉，我問佢地有咩分別，佢話千層肉即係用腩肉卷住，我怕肥，所以叫左咕嚕肉。睇見個款好似好得咁喎，其實呢碟咕嚕肉，色香味俱全，只可惜啲肉太乾太鞋，後悔無叫千層肉，相信千層肉一定會好食好多。上湯浸枝竹小白菜，不造作嘅味道，好有家的感覺。另外仲有叫左個砂鍋炆龍躉，本來打算蒸龍躉嘅，但伙計話要等20分鐘，不如炆啦，心諗唔係麻，佢咁講咁就照聽啦。不過無影相，味道係唔錯嘅，但略嫌個芡汁有點杰。