餐牌有唔同口味魚麵撈，今次仲多左魚湯麵。仲有小食如腸粉，薯條，燒賣，飲品有茶有酒。
羅定魚腐＋魚皮餃魚湯麵 $52
今日凍冰冰，先黎一碗魚湯麵，揀左配料係羅定魚腐＋魚皮餃。店員細心將湯同料分開，等你食之前先加埋一齊。首先主角魚麵係加入左魚肉造既麵，質感比普通麵彈牙，有d似食緊魚蛋條，味道帶好香既魚味！個魚湯好清，魚味唔錯，我覺得無味精，完全清碗。配料有羅定魚腐同魚皮餃各三件，翠玉瓜兩片，同葱花鹹菜。羅定魚腐同魚皮餃質素都可以。鹹菜令個湯更好飲。
綿綿芝士汁吉列豬扒魚麵撈 全份 $58
如果想重口味少少，可以食魚麵撈。吉列豬扒一大塊一切6片，驚喜地高質，因爲外皮香脆而入面厚肉之餘又嫩口，點埋伴碟香滑沙律醬更加好味道，正！魚麵個芝士汁當然好味，真係好香芝士味，上面加有少量番茄莎莎，旁邊有少少紫菜絲，最後上面仲灑上少量香草。
過癮咖哩汁餃子魚麵撈 半份 $38
半份份量都唔少。餃子數量減半，一客兩隻，脆皮而入面有肉有菜，味道質感都唔錯。個過癮咖哩汁少少辣，好惹味。伴有木魚花同紫菜絲加添味道。當然都有灑上香草。
炸魚無薯條 $33
炸魚無薯條份量好多，成盒都係！看似薯條，其實係炸魚條，外脆內彈牙，味道質感都好特別，好有創意。配有沙律醬，加$5可轉松露醬或者他他醬。
咖哩魚兵團 $18
咖哩魚兵團係一客3件魚形魚蛋，好彈牙而形狀可愛。上面加滿香香咖哩汁同香草，味道好惹味！
總括而言，今餐所有食物都好味道而且好有特色。呢度既外賣紙盒特別厚身同精美。而價錢並唔貴。可以係隔離立食或者行幾步去隔離油麻地公園坐低食。實有下次。
