Cafe Addict (已結業)

今日同朋友落咗佐敦整少少嘢，去到佐敦諗住喺附近搵啲嘢食吓，無意中發現一間Cafe食物質素都幾好，所以喺度推介一下。Cafe Addict. 地址喺佐敦彌敦道221號地舖，餐廳地方都好大，裝修得好有格調，好整潔喺度食嘢感覺都幾舒適。煙三文魚牛油果沙律 88 元，份量真係好多，煙三文魚全部都好大片，而且仲有好多塊，食落去味道甘香鮮甜，一食就知道三文魚非常新鮮，可能有少少油脂令到味道更加香口，牛油果配搭三文魚味道真係好夾，入口有口感味道又有層次，沙律酸酸甜甜食落去特別開胃。鮮帶子明太子醬長通粉 128元，帶子比較厚身，入口味道鮮甜，配搭埋明太子醬，令到個鮮味更加突出，長通粉亦都煮到啱啱好，軟硬度適中，食落去更加有口感。整體嘅味道香濃，帶子口感同味道都做得好出色。最後梗係要點返杯香濃嘅咖啡，咖啡口感好幼滑，味道帶點甘香。下次過開佐敦都會再嚟幫襯，無論環境同埋食物嘅質素都做得好出色。