小火焰韓式咖啡廳 (樂富廣場A區) (已結業)

今日係樂富同fd約咗食晚飯，係樂富廣場無意中發掘到呢間韓國餐廳，佢嘅環境裝修都幾舒服，座位都幾多，坐得好舒服！我哋嗌咗兩個主食，第一個係燴牛肋淮山麵配蕃茄濃湯，啲牛肉炆得好入味，食落好嫩，個蕃茄湯底夠曬濃，啲麵吸曬啲湯底食落真係好開胃！另一個就係韓國必食嘅牛肉石鍋飯，呢個石鍋飯份量真係好大份，起碼夠三個人食！好足料食落，啲飯焦又夠香！我哋另外都點咗份石板韓風魷魚，呢個魷魚食落都好爽口，佢仲配搭咗一啲泡菜同埋椰菜，食落幾爽口，都值得一試！最後仲有叫左份酥脆磨菇雞翼，入面仲有包住好多芝士，咬落成口芝士香味，啲雞都烤得好香好脆！平時都好少機會會食韓食，估唔到呢間水準咁好，係少有令我認為值得一食嘅韓國餐廳！