食物質素絕對有驚喜，一問之下原來餐廳最近菜單有所調整，不停改良菜式。
鬼滷花雕鮑魚 $98/4隻
酒味足但唔掩蓋咗鮑魚本身嘅鮮味，鮑魚夠淋亦非常入味，酒味唔會只停留喺鮑魚嘅表面，前菜而言非常開胃
24小時慢煮牛仔骨 $168
慢煮牛仔骨十分出色，除咗煮得剛剛好肉質鮮嫩外，配菠蘿、沙律菜亦十分清新。牛仔骨下放咗嘅洋蔥吸收晒醬汁同牛仔骨嘅肉味，洋蔥爽脆嘅口感同菠蘿嘅酸甜令呢碟牛仔骨生色不少
原味鬼滷飯 $25
鬼滷飯分原味同辣味，分別在於配菜嘅菜脯。原味菜脯唔太鹹，配搭脆卜卜的紫菜，加上香口嘅芝麻令煮得剛剛好軟硬適中嘅白飯錦上添花
潮式蠔仔粥 $108(2人份)
以方魚乾、大地魚熬成嘅湯底煮脹卜卜嘅蠔仔令呢個潮式蠔仔粥鮮味十足，湯底本身加入咗少量胡椒粉，令呢個蠔仔粥增加咗味道嘅層次。
荔枝接骨木梳打 $42
起初拎起飲品時搖到冰嘅聲音，好奇點解密封嘅罐裝飲品內裡有冰。原來鬼滷鬼馬地將飲品放入鋁罐再以啤酒罐封罐形式將罐密封，充滿特色同非常新奇。荔枝接骨木梳打本身唔會太甜，送潮菜幾夾
金柑百香果（熱）$30
不得不提嘅係鬼滷嘅服務，店員態度非常貼心親切，耐心講解餐廳嘅食品，推介菜式，又不時問食物質素如何，期待再嚟試下其他嘅嘢食。
