立鮨 (安富大廈) (已結業)

立鮨初開張時已到訪多次，時隔多年分店已經開到港九新界都有🍣 同朋友第一次到訪荃灣分店，進註地點方便嘅路德圍，食質素一樣保持到水準！餐牌上除咗大量款式壽司選擇之外，亦有唔同盛合配搭。除咗魚生亦有熟食、飯麵、串燒等等，加上每月精選，花多眼亂！今次兩個人食lunch決定散叫，可以揀自己最鍾意嘅壽司🫶🏻一向鍾意重口味魚類，所以揀咗幾款火炙壽司，全部質素都唔錯！火炙深海池魚、北海道帶子、左口魚裙邊、三文魚等等，經過火炙之後油份充分逼出，每一啖除咗魚嘅鮮味仲多一份油香，超級好食🤤朋友鍾意食刺身，所以點左中吞拿魚腩，一份有三件都幾厚切，鮮度亦好足夠。熟食揀咗鰻魚櫻花蝦玉子燒，蛋漿加入櫻花蝦同埋蔥花，令鹹香更加提升。上面再加一塊鰻魚，整體口感味道都好豐富！