馬祖 (將軍澳廣場) (已結業)

今日同朋友去左將軍澳呢間台式任食火鍋。有120分鐘藥膳養生火鍋放題。有6款唔同價位嘅套餐可以揀，我地就揀左中價位嘅$298套餐，有美國 Prime Grade 極上牛頸脊同埋西班牙伊比利亞黑毛豬可以任食。呢到係一人一鍋，所以同朋友可以各自揀自己鍾意嘅湯底。我就揀左藥膳椰子清雞湯，食落有好清甜嘅椰子味，仲有啲杞子同紅棗，感覺好補。朋友就揀左日本壽喜燒Sukiyaki湯，甜甜地，用黎淥牛肉好夾。美國 Prime Grade 極上牛頸脊食落嘅牛味香濃，肉質都幾鮮嫩。至於西班牙伊比利亞黑毛豬食落好彈牙同埋好香，我比較鍾意食豬肉。另外可以自己出去拎任食嘅菜同埋丸，仲有我鍾意食嘅深海魚柳。任食嘅菜竟然有羽衣甘藍，幾有驚喜。最重要係有任食嘅Movenpick雪糕，我同朋友每人食左三杯，實在係回本之選。整體黎講，呢間火鍋放題性價比幾高，可以再食。