泰Grill (天晉匯)

叫咗兩個午市套餐，佢嘅套餐唔加任何嘢嘅話平均係80幾蚊，我哋首先有一個海鮮冬陰功湯金邊粉，都算幾大碟幾豐富，小小嘅辣味，但其實又唔覺得辣，幾適合香港人口味，入邊都有幾隻蝦同好大隻嘅帶子，算係幾惹味。另一個餐就係蛋包虎蝦炒金邊粉，即係Pad Thai，佢隻蝦做到好似軟殼蟹咁，但又未至於炸到連啲殼可以食得，但係炸得都幾惹味，首先將啲金邊粉撈上配點，再滴一啲青檸汁，味道幾唔錯。兩個都有前菜，分別係青木瓜沙律同冬陰功湯，兩個都有少少辣，但係係合適程度，而且都係幾好味，就算唔食得辣嘅人都係一個好選擇。另外仲加咗春卷，個皮幾脆，雖然啲餡就唔算多。差啲唔記得咗最尾我哋仲有甜品芒果糯米飯，泰國嘅經典甜品，呢個食落啲飯就一般，覺得有啲嚡同韌，但味道嚟講都係唔錯嘅。我哋有兩杯特色飲品，一個係珍多冰，另一個係茉莉奶茶，珍多冰幾濃味唔錯，杯奶茶就好似綠茶多啲。整體嚟講食物質素OK，份量都算係咁，又唔會貴，但又未至於好抵食咁，埋單$312另加1 ，屬於中上，得閒過嚟可以試吓泰式嘅風味。餐廳如果地鐵站過去可以喺A出口嗰斑馬線行去天晉會旁邊有幾間餐廳，佢就係其中一間。另一個方法就係Popcorn過天橋再落一層。H5