影片
更多
2013-11-05
119 瀏覽
最近升級成為「資深食家」o既XO非常榮幸今次被抽選成為Openrice x Flint Grill & Bar Tasting Event 其中一位試食成員，小弟在此首先要鳴謝兩個主辦單位Openrice及Flint Grill & Bar！因從未被邀或出席過此類試食活動，XO仔一收到通知就已經好興奮 ，當然係立刻答允參加啦！Flint Grill & Bar位於金鐘核心地段，太古廣場對上o既JW萬豪酒店五樓。乘坐巴士、電車、地鐡，均可於太古廣場站落車，廣場內有升降機直達酒店，非常方便。據經理Richard所講，餐廳可容納約144-146人，共分開四部份：酒吧、Sommelier’s Table（品酒師之桌）、Chef’s Table（廚師桌）及Open Kitchen（開放式廚房），各具特色。如果想要更多私人空間，客人亦可選擇喺兩間private room用膳。餐廳室內裝修由EDG設計，酒吧以磚砌成牆，雲石作吧枱，加上黑色木地板，潮得黎又涼浸浸，認真cool上加cool！室內燈光柔和，環境優雅，舒適衛生，餐桌圍繞住Chef’s Table及Open Kitchen，令食客可以同廚師
Flint Grill & Bar位於金鐘核心地段，太古廣場對上o既JW萬豪酒店五樓。乘坐巴士、電車、地鐡，均可於太古廣場站落車，廣場內有升降機直達酒店，非常方便。據經理Richard所講，餐廳可容納約144-146人，共分開四部份：酒吧、Sommelier’s Table（品酒師之桌）、Chef’s Table（廚師桌）及Open Kitchen（開放式廚房），各具特色。如果想要更多私人空間，客人亦可選擇喺兩間private room用膳。餐廳室內裝修由EDG設計，酒吧以磚砌成牆，雲石作吧枱，加上黑色木地板，潮得黎又涼浸浸，認真cool上加cool！室內燈光柔和，環境優雅，舒適衛生，餐桌圍繞住Chef’s Table及Open Kitchen，令食客可以同廚師們及烹調過程黎個近距離接觸，氣氛唔會咁局促或拘謹，感覺親切大方 。
試食當日XO仔早到咗十分鐘，不過餐廳酒吧位置已聚集多位「資深食家」、「殿堂食家」及負責活動o既工作人員 。活動三點半先開始，每位食客一到，服務生隨即送上水一杯，menu一份，酒店及餐廳職員亦不忘派咭片，為餐廳作出簡介，態度誠懇，服務貼身！
食評們好多都係相機不離手，見時間未到，酒吧區域已有調酒師調製雞尾酒，就連最近升咗做酒店Executive Sous Chef o既Jordi亦親自下廚炮製小食 ，似乎JW萬豪酒店非常重視今次試食活動！眼見小肥對住陌生o既環境比較害羞，兩位Openrice編輯帶同其他幾位食家主動上前自我介紹，好讓大家互相交流 。
大家周圍影相時，兩位調酒師先為大家呈獻上一杯粉紅色雞尾酒"Distinguished Patron"。
"Distinguished Patron"（$120）：此款雞尾酒以Tanqueray No. 10 Gin、新鮮raspberry、自家製糖漿及蛋白調製而成。見到小肥有少少驚嚇o既反應，哥哥仔即刻解釋話蛋白係經過處理，絕對衛生，叫大家可以放心飲用！粉紅色o既"Distinguished Patron"酒味唔係太濃，味道帶甜易入口，好refreshing ！約三時四十分，駐店經理Richard正式為試食活動揭開序幕，介紹JW萬豪酒店旗下新餐廳Flint Grill & Bar o既架構、概念、設計、主要人物、食材選購等。講到食材，Richard話因餐廳著重食材新鮮，好多菜式都未必會列明喺餐牌上，要即日睇吓廚房搜羅到啲乜，先由服務生為客人推介。此外，餐廳逢星期一至五提供午市優惠套餐，週末則有brunch buffet，頗為多元化。簡介完畢，Richard順勢交棒比酒吧負責人，JW萬豪酒店星級調酒師Bryson Rivera即席表現調製火焰雞尾酒"Feint Obscurity"。"Feint Obscurity"（$140）："Feint Obscurity"雞尾酒以Angostura Mist、糖、提子乾、Ron Zacapa 23 Rum及煙燒cinnamon wood chips所調製。小肥只係喺酒杯旁聞一聞都已經有少少暈，心諗雞尾酒應該幾"kang"，哈哈，當然係冇膽試啦 ！
雞尾酒示範完，餐廳已經安排好幾款小食喺雲石枱上比大家送酒。三十多人圍住張吧枱，為免增加混亂，排喺龍尾o既XO仔最終喺枱邊隨便攞咗兩件小食就坐埋一邊慢慢欣賞：
酒吧小食之Cheese & Iberico Ham Croquettes, Apple Compote, Romesco Dip（$70）：芝士球熱辣辣，香脆鬆軟，帶咸得黎又唔會過火，點上蘋果味o既醬汁，好味 ！
酒吧小食之Foie Gras, Potted Terrine, Walnut Bread and Fig Jam（$160）：（小肥手腳慢，所以未有機會品嚐 。）
酒吧小食之Crostini of Iberian Ham, Smoked Piquillos & Cantabrian Anchovy（$80）：火腿出乎意料地一啲都唔咸，而且肉味香濃，配上早前o既"Distinguished Patron"雞尾酒簡直係一流 ！
我地四點鐘左右離開酒吧區，踏入Sommelier’s Table，由品酒師Kevin講解佢工作範圍，即為客人揀選餐酒及wine and food matching。Kevin揀酒不離品酒三步曲之「睇、聞、舌」：「睇」係指酒o既色澤，「聞」係指酒o既氣味，「舌」係指酒o既味道；當中以「聞」為主。
聽完一段酒經，進入Chef’s Table及Open Kitchen，大家已經可以見到德藉主廚Sven喺廚房中央帶領住其烹飪團隊忙碌地準備各式美饌比大家試食，更擺放好全套菜式喺長枱度供食評們拍攝。
因XO仔略懂德文（嘻嘻，其實只限打招呼 ），所以主動跟Sven寒暄，得知佢喺家鄉德國米芝蓮二星及三星食府工作過，較早前亦喺廣州一家酒店逗留過兩年。Sven愛用新鮮食材炮製出烤物，以提升原材料最真實o既味道，不過佢同時亦喜愛鑽研調味汁，更極力推介XO仔要細嚐主菜Rib Eye之秘汁。
踏正四點半，三十多位食家終於埋哂位，分開每四人一組進行試食。Flint非常大方，除咗無限量供應紅、白酒之外，每枱o既食物都係full portion，即足一份 。（大家請放心，XO仔絕對唔會因酒店及餐廳o既慷慨而道出失實之評價。）頭兩道為沙律頭盤，XO仔最怕食菜，週末更加被小弟視為「冇菜日」，所以雖則蔬菜外貌光亮新鮮，XO最終都只係蜻蜓點水式試咗一口而已 ：
頭盤之Burrata - Heirloom Tomato, Wild Arugula（$160）：蕃茄唔酸，質感爽脆濕潤。
頭盤之Organic Beets - Crumbled Goat Cheese "Crottin de Chavignol", Mache Salad, Xeres Dressing（$130）：Goat cheese味道出名濃，而且勁到唔係個個人都頂得順，小肥自問無咁o既能耐同膽識去試，同桌o既食家們對依味沙律亦有不同評語。
試完沙律，Flint先送上兩款是日海鮮冷盤，再安排五道主菜及四種配菜供食評們續一品嚐：
海鮮之Crudos - Chef's Seasonal Creation of the Evening - Tuna Tartare（$180起）：精選魚生之吞拿魚他他，面層為味道最濃烈o既三文魚子及味道較淡o既菜絲，底層為香滑o既牛油果，主菜吞拿魚就夾喺中間，側旁伴上香脆o既Flaxseed多士；此道菜式無論係視覺上、口感上、定係味覺上都好有層次。因為各種食材o既味道同質感都較為極端，即一係太咸、一係太淡、一係太腍等，師傅依個配搭剛好將其極端之處中和，讚 ！
海鮮之House-Cured Salmon - Honey-Mustard Dressing, Flaxseed Toast（$150）：Flint自家醃製o既三文魚外表平平無奇，但入口就知道佢唔係普通o既煙三文魚！每片三文魚都好薄，食家可自行加上面層o既黑魚子醬及伴碟o既蜜糖芥辣調味汁，再將三文魚卷起或切成細細片黎食。自製三文魚卷感覺上應該未有經煙燻過，味道鮮甜幼嫩，非常清新醒神，此道廚師食客互動菜式簡單得黎好出色 ！
經典美食之Boston Lobster Baked Thermidor Style（$380）：芝士焗龍蝦係一味比較傳統o既西式主菜，好多地方都會食得到，不過大部份都唔多合格，因煮龍蝦其實好考功夫。小肥唔係刷鞋，不過Flint個芝士焗龍蝦真係好有水準：第一，龍蝦肉做得非常爽脆，一啲都唔嚡、唔老 ！第二，芝士汁唔會太creamy；第三，蘑菇份量充足，令整體唔會好溜！
經典美食之Veal-Cheek - "en route" slow-cooked Osso Bucco Style, Gremolata（$280）：牛仔肉就食得多，小肥都係第一次食牛仔面珠墩，依味主菜真係為XO仔帶黎好多驚喜。首先，我地同桌o既每一位食家都好欣賞層夠哂鬆化香脆o既酥皮 。此外，酥皮o既面層原來有一件香滑入味o既骨髓 ，餐廳真係闊綽！主角方面，牛仔面珠墩軟腍味濃，連同層酥皮一齊食尤其精彩，必吃推介也！
烤製菜式之Nebraska 63 Dry-Aged on the Bone Rib-Eye（$580）：平時食西餐好少會揀牛扒，因個人比較鍾意食中式或韓式醃製過嗰啲牛肉菜式。Flint依道肉眼扒熟medium rare，肉味濃郁，肉質唔嚡又夠肉汁，配上大廚Sven極力推介o既秘汁 ，連XO仔都要大讚「正」！
烤製菜式之Six Point Berkshire Black Pork Chop - Fennel Seed Crusted, Apple Compote（$280）：醃製過o既黑豚扒英國進口，層肥膏幾實幾犀利，不過如果唔連肥食又會有少少嚡，入口時嗰份矛盾感就好似食東坡肉或者係五花腩咁，想食但又怕肥 。烤製菜式之Seafood Grill - Catch of the Day, 1/2 Boston Lobster, Red King Prawn, Pot of Mussels（$380）：多種健康理由所限制下，烤海鮮拼盤中小肥只係食咗鮮甜香滑幼嫩o既sea bass。眼見同桌o既食家都能夠差不多食哂成盤，估計其餘海鮮都應該做得好唔錯。
精選配菜之Fries - Rock Salt, Rosemary & Old Bay Seasoning（$60）：薯條夠幼，又夠野味，如果可以少啲油，效果應該會更佳。
精選配菜之Forest Mushrooms - Garlic Butter & Parsley（$60）：以香蒜牛油煮製o既炒雜菇香濃入味，配上牛扒同黑豚扒食都好恰當。
精選配菜之Creamed Asparagus – Hollandaise（$80）：（XO仔食蘆筍會骨痛，嘻嘻，又多個藉口食少樣蔬菜 ！）
淨係睇小肥上述o既描寫，大家都可以想像到我地食完五味主菜時有幾飽。無奈因餐廳要準六時正開門做生意，所以未能給予食客足夠時間去消化食物 ，就趕住上哂四款甜品。講真自己真係食到攬住個肚，不過小肥終於可以証實食甜品原來真係有另一個胃架 ！
甜品之Smore - Soft Chocolate Tart, Marshmallow, Graham Cracker Ice-Cream（$80）：記得細細個去美國露營時曾經食過，當時導師解說話"Smore"係美國文化之一，露營bonfire時間之必吃甜品，仲話相傳"Smore"係"some more" o既縮寫wor 。雖然主材都不離朱古力、燒棉花糖、Graham Cracker，不過Flint演繹o既Smore甜品比起我多年前食過o既Smore三文治精密而又美味得多 ，最精彩就係燒棉花糖底下嗰層夾住Graham Cracker o既朱古力撻，鬆化香脆又唔會過甜，配上清香軟滑o既Graham Cracker雪糕同薄脆簡直係頂瓜瓜！
甜品之Key Lime Cheesecake w/ Seasonal Berries, Candied Ginger Ice-Cream（$80）：芝士蛋糕好似我以前喺美國食過嗰啲咁甜，對香港人黎講會太甜，不過如果連同蛋糕面o既忌廉同伴碟o既薑味雪糕一齊食就可以緩和啲甜味，小肥亦可以接受。相反地，對於外國人黎講，尤其係美國人，甜味指數應該只屬啱啱好。甜品之Banana Cream Trifle（$80）：食依個香蕉甜品時感覺就好似食緊件香蕉味o既Tiramisu咁，有酒、有忌廉、又有蛋糕，口感同味道都好有層次，如果稍為冇咁甜就更加好。
甜品之Chocolate Soufflé with Hazelnut Sauce（$90）：每當食得太飽時，接住入口o既食物o既美味程度都會大幅下降！好在最後上o既一味甜品係食落猶如空氣o既梳乎里，皮脆鬆軟，朱古力味濃得黎又唔係好甜，加上香滑o既榛子醬，成功為當日試食活動劃上完美o既句號 ！置身於五星級大酒店o既Flint Grill & Bar，環境新潮得黎又不失優雅舒適衛生，無論係商務聚會、一家大小、情侶一雙、三五知己、亦或係同事成群都同樣適宜。酒店級o既服務當中，以高級職員o既細心體貼最為突出，佢地會不時問及食家們o既意見及感想，態度認真且誠懇。調酒師、品酒師、大廚們都毫無架子，友善好客，其調酒及廚藝表演亦非常精湛細膩。餐廳選用高質o既新鮮食材，加上廚師用心研製菜式醬汁，無論係雞尾酒，頭盤、主菜、定係甜品，各式各樣o既食物都有奇獨特之處，最緊要係餸菜美味可口，有得免費品酒嚐美饌o既XO仔覺得今次驚喜試食體驗絕對超值 ！
後記：試食活動後，XO仔馬上同家人分享，並且推介Flint Grill & Bar餐廳，佢地更立刻訂座閒日黎食午餐。對於價值$280及$320（揀選10安士牛扒）o既午市套餐，各人都大讚價廉物美、食材優質、菜式美味、份量足，最抵就係以匯豐咭找數仲有折扣優惠添，小肥真係冇介紹錯 ！
張貼
