蘇媽.蘇媽馬來西亞茶餐室 (已結業)

上次試左So Bar，但仍然未試過蘇媽，今次出開尖咀終於有機會喇。雖然係weekend，因為係下午茶時間黎，所以食客唔多。店內走懷舊馬拉風，好似去左馬拉一樣，不過哩度最大唔同係有冷氣，唔怕熱到冇胃口食。天氣炎熱，胃口一般，反而係想飲凍野，所以每人叫左杯凍飲再加少少野食share。桔仔話梅水(跟麵優惠價$25) - 似似地星馬成日飲倒嘅酸柑水，酸酸甜甜咁好開胃最啱而家哩個天氣飲。似水榴槤($48) - 好重榴槤味，盲算飲倒最後啲冰融左啲都榴槤控必點！湯咖哩麵($58) - 哩碗咖哩麵非常惹味又足料。成碗滿晒，湯底比較杰身，好香咖哩味，辣度大約係小辣，辣得過癮又唔會好辛苦。麵係油麵同米粉摻摻，麵質唔會太腍，麵量都好多。入面有豆角、豆卜、薯仔、魚蛋同魚肉卷，如果本身唔太肚餓夠兩個人食。抹茶榴槤糯米糍($62) - 糯米糍咬開入面全部係榴槤蓉，好香榴槤味，抹茶皮口感煙韌，不過就唔太食倒抹茶味，同埋如果皮再薄啲更好。總結，咖哩麵同野飲都好地道好似星馬嘅味道，份量好足價錢亦唔貴，仲要唔洗加一，有機會都會再試埋佢其他麵。