雲南啊老表黑山羊湯鍋米綫 (觀塘工業中心) (已搬遷) 新店位置

今日去朋友位於觀塘嘅showroom參觀，順便等埋朋友一齊食飯。想簡簡單單食碗米線，但x仔米線又食到有啲悶。問朋友附近有乜特色米線食，朋友就話附近有間羊肉雲南米線，羊肉米線又真係幾特別一於試吓。既然主打羊肉米線就叫一個羊肉酸辣大碗，另外叫咗口水雞同麻辣豬耳同朋友分享。大碗份量真係非常巨大，$58好抵食！可樂放喺隔離，突然之間覺得好迷你！湯底係豬骨湯底，加咗羊肉之後幾香，酸辣味係由添加嘅酸菜同辣椒而來，酸香不嗆！羊肉份量都幾多，有皮嘅位同瘦肉都有。羊肉煮得夠淋，肉味濃之餘，保留點點香羶，鍾意食羊肉嘅朋友一定滿意。口水雞雖然其貌不揚，但味道夠麻辣！豬耳份量比其他餐廳大，做得夠爽脆，唔錯！總括嚟講呢間餐廳嘅米線風味幾傳統，羊肉米線又少見，下次又來食過先。