馬祖 (將軍澳廣場) (已結業)

今日經過將軍澳廣場， 見到呢一間新開嘅馬祖，主打台式藥膳火鍋放題。湯底都有好多款選擇，價錢唔貴， 我哋選擇左一個$223嘅Prime Grade牛肩胛肉放題套餐，有Prime Grade牛肩胛肉、西班牙無激素豬肉片，同自取嘅台灣沙茶牛肉、雞腿肉、魚柳。自取區仲有好多款甜品飲品同埋丸類蔬菜等等， 非常豐富。首先我哋選擇左椰子雞湯底及麻辣鴨血湯底，湯底透着香濃嘅藥膳味道，椰子清甜，麻辣鴨血就好足料，有唔少鴨血係湯底入邊。一落完單，兩碟牛兩碟豬好快上枱，Prime Grade牛肩胛肉，牛味香濃，肉質鮮嫩。西班牙無激素豬肉片好有驚喜，肉質Q彈，肉味鮮甜，而且脂肪比例剛剛好。自取區都有唔少嘅台式丸類同台灣腸，最特別嘅係有墨魚台灣腸同芫荽燒賣，選擇好豐富。我比較鍾意嘅係墨魚台灣腸味道好香，感覺好特別。甜品區同飲品區都有好多款，尤其雪糕嘅選擇非常多，仲有平時放題比較少有嘅口味，食多幾杯雪糕都回番本。整齊價錢唔貴，食物質素唔錯，選擇方面都好豐富，性價比幾高。