王牌冰室 (Savannah Place) (已結業)

喺將軍澳澳南依個新樓盤，樓下商場Savannah Place都有一間價廉物美嘅冰室。咁同朋友見有啲肚餓就去食吓嘢。今次食咗幾種佢哋嘅皇牌：.皇牌之選：特濃牛乳炒滑蛋叉燒蝦仁雙拼飯依碟皇牌上枱嘅時候，已經睇得出炒蛋火候啱啱好而有個好好睇嘅賣相，炒蛋因為好滑配落啲飯到好順口，而叉燒同蝦嘅份量都好足夠，味道同埋香味都幾好水準。.爆餡之選：芝士。生菜。鹹牛肉。炒蛋三文治見到咁多材料嘅三文治都知有一定厚度，而言佢哋炒蛋嘅水準，佢哋三文治都好好味喇，芝士嘅濃厚，鹹牛肉嘅咸味，炒蛋嘅滑同埋生菜嘅爽脆，仲有烘得啱啱好嘅麵包，整個配合得天衣無縫。.常餐之選：瑞士雞翼撈麵依個瑞士雞翼真心幾入味而且厚肉，唔係間間都有咁嘅貨源，另外個麵嘅汁同質地都有啲特別，好值得一試。.驚喜：椰汁紅豆冰重椰汁味嘅紅豆冰好耐都冇飲過喇，而紅豆都煮得夠甜夠冧，係真真正正冰室出產嘅紅豆冰。.其實佢嘅霓虹燈裝飾都幾懷舊，想體吓啲裝修都可以去參觀吓。