為食仔海鮮火鍋專門店

營業中

休息中

今日同男朋友出嚟食飯，佢話未食過蜆煲，所以就同佢出嚟食呢間卜卜蜆。甩佢餐牌寫原來九點後卜卜蜆無限時任食，但我地今日早左出嚟，所以就就咁嗌佢個招牌蜆煲。佢個蜆煲份量好足，真煲好多隻，最重要係咁多粒，真係一粒沙都食唔到，呢樣真係最重要。而佢個湯係好簡單地就咁蒜蓉三幾粒辣椒仔，主要食到蜆本身嘅鮮味。食完晒啲蜆就可能開始打邊爐，不得不讚呢度個老闆同伙記們都好好禮貌，又好好笑容，不時幫你換下碟，又會介紹下佢地啲煲，因為佢地太多唔同嘅味道揀啦，見你揀到迷惘樣，佢都好樂意介紹唔同煲煲咩特色，協助下你嘅選擇困難。我地嗌左個安格斯肥牛，肥瘦適中，好軟腍。然後我覺得最有驚喜嘅係佢個韮菜餃，皮薄餡足，韮菜同肉嘅比例岩岩好，好香韮菜味但又唔會食到口臭。最後就嗌左個紫菜炸響鈴，佢係喺響鈴中間夾左啲紫菜，所以會比普通響鈴硬身小小。但索晒頭先煲蜆嘅湯，真係好鮮甜。飲品我就嗌左佢杯菠蘿沙冰，因為我覺得沙冰大大杯，好襟飲，而佢係用菠蘿加冰打成蓉，冇加糖水，唔會太甜。