權記雲吞麵

營業中

休息中

權記由細食到大，由炮台山第一間舖就因為拾蚊碗而成為擁躉，雖然由拾蚊碗食到依家廿蚊碗，但權記都仲係跑贏大市；今日喺中環開完會，醒起都起碼超過成年無食過權記喇，就嚟懷緬吓佢個魚露加辣油先。阿姐話無牛腩，唔知係呢間無賣定係賣哂呢?嗌咗個牛肉河加淨雲吞，雲吞一如以往好似乒乓波咁大粒，我鐘意一粒分四啖食，喺每一啖之間點啲舖頭自炒既辣椒油；牛肉被輕輕醃過，鬆肉粉又唔會話落太多，都仲係二十年如一既嗰隻味，呢隻味係要喺權記先至搵到既；河粉嚟講比起好多雲吞麵舖都要滑；湯底有熟悉既淡淡魚味，食到一半落啲枱面我至愛嗰三寶，魚露，醋同辣椒油，好似有啲泰越風味咁，又係另一隻食法。