Dodam Chicken (利舞臺廣場)

營業中

休息中

韓國菜係有種魔力，會令人每隔一段時間就心思思想食。呢間韓國菜係我最鍾意嘅其中一間，價錢實惠得來又好食。好剩返銅鑼灣呢間，所以今次又心郁郁想食韓國菜嘅時候，專登走過嚟銅鑼灣食返呢間我最愛嘅韓國餐廳。呢度嘅餐牌有好多選擇，除咗有炸雞之外，仲有健康嘅烤雞選擇。但係今日就冇理到咁多，因為中午嗰餐食得好難食，所以決定夜晚就要隨心所欲咁樣嗌返啲自己鍾意食嘅邪惡食物，補償返受創嘅心靈。首先嚟嘅係黑松露卡邦尼炒年糕，呢碟係我其中一碟成日會掛住嘅菜式。黑松露嘅香配上濃郁嘅卡邦尼醬汁，再配埋意粉或者年糕，兩者配搭得天衣無縫。跟住再嚟嘅係雙重芝士麵包辣烤雞，雞一啲都唔辣，反而有啲酸香，整體嚟講我覺得比平時食嘅甜辣炸雞更加唔辣。呢樣嘢可能係因為有芝士中和咗啲辣味醬汁，所以一啖咬落去芝士嘅香味蓋過咗啲辣度，令到成個配搭更加惹味香口。牛排骨湯一上枱嘅時候泡泡中咕嚕咕嚕咁樣煲緊出嚟，熱辣辣嘅湯無論係冬天定係夏天飲都會令人深感溫暖。湯入邊仲有好多舊牛仔骨，肉質香而且切得好厚，有湯飲又有肉食，仲有粉絲，一次過滿足晒幾個願望。而且呢度有好多卡位最鍾意同朋友有私人空間傾吓偈食個飯。