小火焰韓式咖啡廳 (樂富廣場A區) (已結業)

媽咪生日，所以就決定同佢過嚟食餐好嘅嘢食呀。我哋叫咗一個1901路梁津海鮮炒飯，叫咗一個綠茶拿鐵，同埋朱古力糯米糍雪花冰。 呢度可以電子自己落單，咁就唔會錯喇。10分鐘就有嘢食送黎。個炒飯用石鍋裝住，保溫正，仲做到好似少少煲仔飯咁，有啲飯焦喺度，而且充滿韓式風味，打卡一流。用料都好豐富，有魷魚鬚，仲有四隻青口，四隻大蝦，啲蝦夠晒新鮮，咬落夠彈牙，唔會黐住個殼。呢個醬汁都非常之好，少少辣辣地夠惹味，個飯返好快我哋就食晒啦。 綠茶拿鐵可以飲到奶香味，唔係奶精味，唔會過甜，加埋面頭嘅綠茶粉同奶泡裝飾， 媽咪即刻影相。 到最後個甜品又睇得又食得，有成三大粒朱古力糯米糍，糯米糍煙煙韌韌，出邊仲有啲朱古力粉，咬落去軟淋淋，配埋雪花冰，真係夏日必叫嘅甜品。