韓點 (紅磡) (已結業)

我本身好鐘意食韓國嘢，不過去到韓國餐廳通常掛住試唔同嘅餸菜，都無咩機會叫炸醬麵呢啲咁飽肚嘅食物。平時睇韓劇成日都見到啲演員食炸醬麵同伴飯，所以我對呢兩樣嘢都充滿住好大嘅幻想，覺得好好食咁。呢間鋪頭係電視同雜誌都有介紹過，話老闆夫婦係韓國人，所以味道正中，而且係速食嘅小食店，我就想試好耐架啦，奈何我無咩會去到嗰頭，所以遲遲未試到。終於有機會去開，當然要試試啦，食咗韓式魚蛋，係長形的，有別於我地平時所認知嘅圓形彈牙魚蛋，而且會跟少少湯俾你，個湯好清甜，同日式嗰啲關東煮嘅湯差唔多味道。仲食埋期待以久嘅韓式炸醬麵，嗯，我只可以話同我想象中嘅味道有啲出入，唔係我鐘意食嘅味道囉，只係可能我唔係好接受到嗰隻味掛，不過同一般韓國食品一樣係偏甜嘅口味，如果一個人食晒成碗可能會有啲膩。不過我相信只係我受唔到嗰隻味而已，因為好多人都仲係好鐘意食嘅。雖然鋪頭細細，不過選擇都ok,感覺老闆夫婦係好用心去做嘅，去開附近可以去試下。