Plato Cafe & Bistro (Mikiki)

今日嚟到新蒲崗Mikiki，同朋友嚟咗呢間餐廳，一行到入去覺得個環境好舒服，我哋點咗個精選二人套餐，想同大家介紹吓。首先，套餐入面有一道是日餐湯今日係南瓜湯，甜度適中，今日出面氣溫有少少凍，但飲完呢碗湯令人好舒服。接住落來係田園沙律，沙律新鮮爽口，蔬菜色彩繽紛，配上柚子醬汁，酸酸地咁令人好開胃。再嚟就係白酒忌廉汁煮青口，青口煮得恰到好處，佢嘅酒香同忌廉味融合得好好，佢嘅配菜都好吸引。接住落嚟，重頭戲係波士頓龍蝦龍蝦汁意大利飯，意大利飯粒粒分明，吸晒龍蝦汁，都幾香口，龍蝦肉亦係非常鮮嫩，賣相亦都非常吸引。然後，炭燒紐西蘭肉限牛扒5成熟就嚟啦！牛扒煎得好完美，5成熟肉質保持晒多汁，配搭埋焗薯同埋醬汁，味道好正！食完主菜，最後點可以唔提下甜品。自家製開心果麻糬提拉米蘇同是日精選甜品芝士蛋糕，兩款都好有特色，特別係麻糬提拉米蘇，麻糬軟韌，味道唔會太膩，賣相都非常吸引，芝士蛋糕則係濃郁滑溜，強烈推薦！總括嚟講，無論係味道定擺盤都做得好出色，同朋友一齊一定可以享受一個愉快嘅晚餐！