榮記(東成)飯店

營業中

休息中

夜晚9點先搵野食，見好耐無食過大排檔，所以去咗街市搵野食，見到呢間咁多好評，諗住無死，點知好伏！！！伏一：咩都賣曬！！！明明開到凌晨，我地9點鐘坐底，無幾耐已經即刻落單。落左單五分鐘之後，同我地講其中一樣，芥蘭賣曬，咁我地轉通菜啦。再隔多十分鐘先同我地講，通菜又賣曬，唔止添呀，連第一次落單個幾樣，包括椒鹽九肚魚、蒜香蟹飯，全部都賣曬呀！賣曬唔係問題，但你早講呀，隔左十分鐘先講，又講d唔講d，吱牙膏咁，離譜！！！想食既全部都無得食，又黎曬野飲，迫住要係度食！伏二：零鑊氣！！！食大排檔都係貪d野食夠鑊氣、夠惹味，sorry呢間大排檔完全唔合格，我試過咁多間最差既，建議大家去食陳根記或妹記！椒鹽豆腐，無錯係外脆內軟，但無味既，必須要夾住d椒鹽一齊食。茄子煲，非常令人失望，點解！！！點解d料望落去咁足，但食落口完全無味，一d都唔香口！！！擺明求其用水煮熟左，扔落個煲度！同樣地，蜜汁豬仔骨都係咁，豬仔骨剛好熟既，咬落滑身，但無味！點左d蜜汁一齊食，都只會一入口個下有蜜汁味，咬多一啖已經無曬味！好灰咁同職員講，佢竟然話而家要食得健康d，少油少糖少鹽，喂我要健康去左你隔離鋪食素啦！無心煮就無心煮啦！