品香樓中西風味餐廳

營業中

休息中

品香樓真係由讀書開始食到而家，畢左業咁耐有時都專登過黎呢邊食，一班朋友炒下小菜，鐘意熱氣野嘅不失為一個選擇。平日晚上都仲係好多人幫襯，所以通常我地都係打黎訂左枱先，唔想等位，不過如果你係想靜靜地食餐飯就應該唔得喇，因為人多起上黎，真係嘈到坐對面都聽唔到講乜。點左幾款炸野，兩個菜，雞等等，食得好飽，人均都係百零蚊，價錢就真係幾抵食。豬手、雞翼都好香脆；另外四季豆炒雞軟骨好惹味，唔係好辣，送飯一流。炒菜我地點左小白菜同油麥菜，但黎左芥蘭，落單果個話冇寫錯，廚房出左，問我地照食得唔得，我地都冇乜所謂，照食。黃金花枝就真係唔掂，以前好好食，鹹蛋黃味道都仲係好出，但花枝韌到冇朋友，咬都咬唔開…大腸都合格，份量頗多。雞嘅肉質雖然唔算好滑溜，但都幾好肉地，我都好鐘意食。環境就真係唔算坐得舒服，不過人多坐大枱，唔會逼狹。服務方面就個別人士啦，唔係個個都唔好態度，都有啲幾好禮貌，催催單都冇意見。鐘意黎品香樓真係個人回憶，仲有必點朱古力沙冰、芒果沙冰。