Orange Elephant Thai Restaurant (利奧坊) (已結業)

由博文街搬左去利奧坊一段日子，終於有時間黎食，新舖光猛闊落幾好坐。餐廳工作既好似都係泰國人，識講廣東話，但見佢地自己溝通會講泰文，感覺好正宗泰式風味。① 冬陰功湯（小）$95份量夠二至四位用，有幾隻爽口大蝦，大量草菇，車厘茄，好足料。我鍾意呢個味道，惹味開胃，不過朋友覺得有點太辣。② 泰式滷水豬脾焗粉絲煲 $114滿滿既粉絲煲，撥開粉絲摷下就見到下層有好多豬脾肉，滷得好入味，將粉絲撈埋煲底個滷水汁勁好味！豬脾個皮好滑，入口溶化，不過肉質就略嫌唔夠嫩。③ 咖喱海鮮脆包盅 $155以往食開麵包盅感覺個麵包只係個盛載咖喱既容器，呢度個包唔係硬身果種，反而軟綿索汁，外層仲有少少脆口。而個咖喱汁絕對滿到瀉，而且落左蛋花去煮，杰身得黎口感豐富，味道唔會太辣但好香。海鮮亦好多料，有青口，魚柳，鮮魷，大蝦等等，仲要大大件，唔係切粒果種。④ 凍泰式奶茶 $32本身想飲芒果狂熱特飲點知無，叫左杯泰式奶茶，唔會太甜，比較適合香港人口味。呢度食物好味之外，碟碟份量都偏大，絕對適合一班人開心Share，咁先食到多啲款。