興樂菜館

營業中

休息中

同男朋友去左長洲一日遊慶祝拍拖三個月紀念，但竟然唔記得左晚飯要訂位，結果恒樂full booking 唔接客囉，最後食左隔離間興樂。個待應話$188 包三餸，再送時菜同例湯添。個待應勁積極，即刻叫其他枱啲客移過啲，突登開張枱比我地，雖然啲位係窄啲，但誠意搭夠。我地叫左椒鹽九肚魚，蒜蓉粉絲蒸蟶子，豉椒炒蜆，仲有佢送既蒜蓉炒菜心同粟米湯。一坐低先黎個大大碗粟米湯，正所謂食之無味棄之可惜，下次可以叫啲待應慳返，廢事要佢地洗多隻碗。再黎椒鹽九肚魚，雖然啲魚唔算好新鮮但勝在夠熱辣辣，以衣個價錢黎計都算係不過不我啦，而且係堆九肚魚中間，餐廳靜雞雞送多左兩舊椒鹽鮮魷比我地添。之後黎碟蒜蓉炒菜心，正正常常，不過不失啦。再黎豉椒炒蜆，啲味ok 喎，又夠大碟新鮮同夠熱，食咁大碟都係得兩粒有沙，都算唔差啦。最後黎碟蒜蓉粉絲蒸蟶子，味就淡左啲，但啲蟶子都算大隻，粗過隻姆指，粉絲就乾咗啲，仲有好大進步空間，如果揀豉椒炒會可能好啲。不過埋單$188免加一，待應又欣勤，啲野食又夠熱同大碟，食到飽晒都叫可以啦。我地走時仲見到啲人係外面排緊隊等位，好彩我地食得早唔駛等位姐。