新景園咖喱小廚

營業中

休息中

猶記得初出茅廬就聽聞呢間馳名既咖喱豬扒外賣平$30，幾個人柴娃娃外賣返公司食，味道未算一試難忘。 而家可算財大氣粗，就黎試下堂食有冇大分別。 估唔到門外人頭湧湧，竟然唔洗等就入得喇喎。咖喱豬扒飯 ($82)生炸新鮮豬扒可謂齒頰留香，表面酥脆、肉質彈牙，咀嚼下更有一絲甜香，唔洗點醬都好夠味。 最欣賞兩大塊豬扒都係純瘦肉，免除左呃秤又肥膩既煩惱，難得乾爽、唔痴牙。 咖喱係典型重椰漿既港式口味，辣味後勁都幾強，未有太大驚喜，如果有多幾舊薯仔就完美喇。由於即叫即炸，落單後都等左幾個字先上菜，以近乎獨沽一味既餐廳黎講，比想像中等得耐。 奇妙地每一台都不約而同先上咖喱汁、豬扒飯後上，令注重熱度既我有少少心急如焚。 好彩前後差距只有幾分鐘，整體幾夠熱，豬扒即使攤凍左都好脆。由於堂食既咖喱汁另上，令豬扒保持酥脆，白飯亦唔會浸腍，整體比一盒過既外賣出色好多。 最重要既係堂食會多一塊豬扒，啖啖肉夠足料，淨係食肉已經食飽，絕對物有所值。干炒牛河 ($78)夠鑊氣、肉同配料都落足料，可惜比想像中多油，味道亦同坊間出品冇乜分別，性價比較低。茶餐廳格局，本來就預左要搭台。 今次咁岩分中四人卡位，坐得幾闊落舒服。