金羅寶韓國料理

營業中

休息中

嚟過呢間餐廳食過幾次午餐，都覺得幾好食，所以決定寫食評講下佢。金百利有好多食肆，呢間少人排隊，空間寬敞。午市套餐選擇繁多，仲送韓式伴菜、甜品。我地兩個人食送八小碟小食，有: 辣泡菜、醃黃蘿蔔、醃紫菜、薯仔、芽菜泡菜、茄子、豆腐卜同苦瓜。我中意薯仔，茄子同豆卜，味道冇咁辣同重口味，可以單獨當小菜食。甜品可以選擇熱紅棗茶同朱古力雪糕，我地揀紅棗茶，味道好甜、好味。豬肉石鍋雜錦飯$83- 我真係好鍾意石頭鍋飯，大推介！石鍋熱到可以即場炒飯，侍應幫我地落韓式辣醬同撈勻。味道惹味可口，加埋伴菜一齊食好有口感。辣醬份量啱啱好，食一啖飯，飲一啖牛肉白蘿蔔湯，好滿足！下次一定會再點！豆腐煲$83- 個湯勁辣！！不過豆腐超級滑好好送飯，其他配料份量好足夠，如果可以自選辣度就好喇。