老鍋台式火鍋 (京都廣場) (已結業)

今日同男朋友出黎銅鑼灣行街，去到晏晝時間見餓餓哋，就喺附近度搵嘢食。經過京都廣場嗰陣，我哋就揀咗呢間台式餐廳嚟食午餐。

呢度晏晝有午市優惠限定，我哋分別叫咗一個老鍋自選午餐同一個鹽酥雞拼滷肉飯。

老鍋自選午餐

老鍋自選午餐可以自己揀三樣餸，我自己就揀咗香菇貢丸，桃膠同埋鴨血。香菇貢丸都幾好食，桃膠食落冇咩味，鴨血就麻麻地了，冇鴨血嘅香味。

鹽酥雞拼滷肉飯

呢個鹽酥雞拼滷肉飯相對來講就比較好味，啲雞都算脆，不過份量有啲少。但係滷肉飯嘅味道就真係唔錯，比較似台灣嘅口感同埋味道。

台灣蒜香腸

我哋叫咗一份台灣蒜香腸，上面有蜜糖，食落甜甜哋，幾好食。

飲品

嘢飲方面我男朋友叫咗一杯杞子杭菊露，飲落係普通嘅菊花茶味道。因為個杯嘅關係，佢第一眼望落有啲似啤酒，幾搞笑。而我自己就叫咗白桃烏龍茶，淡淡哋幾好飲。


總括嚟講，喺銅鑼灣食到咁平價嘅台式餐廳都算唔錯。