今日係我生日，同老公兩個去o左銅鑼灣搵食~ 由於太餓所以就揀o左食放題。我地冇訂枱，但可能係平日，加上又比較早(6點3左右)，所以都即刻有位。
呢度d款式都好多，起碼甜品同飲品都係任點~刺身款式都唔少，望落都有成十樣。三文魚，甜蝦，帶子，螺肉，象拔蚌，油甘魚.......花多眼亂，所以咩都要d試下
剌身盤 - 好味! 我唔敢話好新鮮，但真係唔錯! 推介甜蝦，帶子，螺肉，象拔蚌!
芝麻雞翼 - 之前食過燒雞翼，呢個應該係新出，好香好脆，好食好多!
花之戀 - 細細件，可以一試
蟹子沙律 - 好似食麵咁，略嫌硬o左少少
燒牛舌 - 燒得唔錯，但咸o左d~
天婦羅 - 推介! 炸蝦最好味~蟹棒同南瓜都ok~
雞軟骨 - 好味!!我一個人食o左5串，好有口感~
芥辣八爪魚 - 麻麻地，冇咩辣味，但好咸! :(
枝豆 - 我唔鐘意食呢d野，但老公話好好味，一個人食晒~
燒菠蘿 - 正!好甜好香，仲熱辣辣添~
燒羊脾 - 平時好少食呢d咁飽肚o既野，但味道唔錯! :)
芝士焗蠔 - 好迷你o既蠔，剩係食到好多配料~但好香口!
海膽手卷 - 手卷唔太大，所以食一兩個都ok，但紫菜林晒，咬極都咬唔開!
奇脆鵝肝卷 - 新野~幾特別!不過奇異果加鵝肝有d怪~我分開黎食仲好味
飲品 - 款式好多，一罐罐一盒盒咁好方便~有烏龍茶，綠茶汽水~可以試下忌廉鮮奶，味道唔錯!
甜品 - 本身有個櫻花糕想試，點知話未有~於是食o左雪糕，豆腐花，芒果慕絲~芒果慕絲麻麻地，好似蛋糕咁~豆腐花係百福，雪糕係牛奶公司~
食完好滿足! 總體唔錯，大食o既人最o岩!
1
1
