為食館

營業中

休息中

成班舊同事約食飯，過咗農曆十五都未約得齊人，終於叫做齊腳可以食個開年飯。有同事之前食過話幾好食，所以就揀咗呢一間大家一齊出嚟聚一聚。當日食係好嘅，因為可以試到唔同種類嘅嘢，同埋佢啲份量都唔細。先嚟碗杏汁豬肺湯，都幾清甜不過杏汁唔算好出。跟住先嚟個餐前小食，呢個好似將茄子嘅物體，個味道幾特別，唔會太鹹又夠清新。跟住陸續上主菜，蝦醬骨唔好俾佢個名嚇親，唔算太濃個味道教得啱啱好。反而隻雞就鹹咗少少，係舊派嘅味道。另外嗌咗個油浸筍殼魚，望落去好似炸得過火咗啲，但係配返啲汁食落去又唔會割喉，同埋啲魚肉都好嫩口。跟住啲舊同事都係未夠喉，繼續坐嗌啲小菜食。個素菜啲豆腐都幾稔滑有豆味。個牛腩條望落去好似好好滯口感，但食落去又OK可能配咗佢個汁食落去就冇咁油膩。幾鍾意佢個小炒王裏面有啲芋絲炸得脆脆。個金沙魷魚都好邪惡，濃濃嘅鹹蛋香味香味送啤酒一流。另外都好欣賞佢個籠仔蒸蝦飯，下便鋪咗錫紙，唔會黐晒啲飯喺個籠嗰度唔會洗死阿姐，客人又可以食晒啲飯唔會嘥。同埋個飯都幾乾身係唔錯。整體嚟講除咗隻雞之外，整體都相當出色。