廚皇茶餐廳

營業中

休息中

Blue Monday食lunch，天氣唔好都頹廢過人，就諗住是但搵間茶記食算啦。我拖着疲累嘅身軀行到去健生。見到有位就入去，連門口水牌有乜食都無睇，同事揀啱時日午餐就叫左湯飯。阿妹同事就叫左海鮮湯飯，同事B就例牌蕃茄肉片湯飯同事C就食午餐A京都骨飯，我唔抽揍米氣鍾意叫粉，今日午餐得兩個一個係XO醬三絲炒銀針粉另一個就係芝士焗魚柳意粉。我叫左前者，俾次機會佢，因為有次黎食無味既，今次好食返，三絲又夠多，仲有有韭王同芽菜洋蔥😍阿妹同事笑說師傅贏左馬仔心情靚煮好啲。京都骨飯汁多，個樣似咕嚕肉既螢光汁，啲菠蘿好大粒，同事話幾好味。另外個湯飯啲海鮮好有誠意，有幾隻蝦、有青口鮮魷，仲有帆立貝唔係就咁帶子，係有裙邊圍住果隻，仲有啲假鮑片。另一個蕃茄蛋肉片就正常味唔假，唔會得現成茄汁加水，兩碗都勁大碗同大公雞碗上。呢間啲凍檸茶其實幾好飲，睇茶色就知有溝茶底，但今日成杯冰咩事，溝淡晒飲兩啖就飲晒😑跟餐飲品仲可以轉時日糖水，今日有兩款，西米露同黑糯米。唔好以為唔使加錢轉會好求其，其實幾足料，出名大食既阿妹同事食湯飯加黑糯米飽到食唔晒。想俾好評不過啲要睇師傅有無贏馬😂