牛極 (庇利金街) (已結業)

近排香港突然多咗好多去食石燒牛肉嘅餐廳，石燒牛肉嘅特別之處係令食客更加容易可以品嘗到肉嘅鮮味，同埋牛肉嘅原汁原味。呢間餐廳係以半自助餐嘅方式運作，只需要喺門口前面嘅自助販賣機選擇想食嘅食物，就可以隨便食餐廳提供嘅沙律，前菜，湯，白飯。雜錦沙律放得非常靚同埋望落好新鮮，餐廳亦都提供足夠嘅種類的沙律醬醬料同調味料，有餐廳秘製嘅牛扒醬，燒烤汁仲有我最鍾意嘅玫瑰岩鹽，我一直覺得玫瑰岩鹽先可以最帶得出牛肉嘅味道，所以真係10分推薦✨牛肩排 180g ($80)牛肩扒係我特別鍾情嘅牛肉部位，原因係因為夠厚，切同埋食落嘅時候覺得特別滿足同埋好味，呢間餐廳嘅牛肩扒油脂非常充足，煎嘅時候好香聞到好大浸牛肉嘅香味，食嘅時候感覺到牛肉嘅肉汁不停喺口入邊爆出黎，認真好味同誇張✨西冷牛扒 200g ($130)牛扒點可以唔食西冷，每一個鍾意食牛扒嘅人都會推薦食西冷牛扒。原因就係因為西冷牛扒嘅牛肉味係最濃郁嘅，而份量就唔會好似牛腱扒咁厚，係相對上厚度比較薄嘅牛扒。我就順着佢嘅坑紋切成整齊嘅形狀，令到牛扒嘅受熱更加均勻，更加能夠控制生熟程度！ 牛扒配白飯感覺非常滿足，我足足食咗兩大碗飯，下次一定會再返嚟！