井巷子 by 鋒膳 (已結業)

呢間米芝蓮中餐廳真係名副其實，每一道菜都係精心炮製，而且餐廳員工亦都非常專業有禮，係一個好享受嘅晚餐。呢度嘅招牌井巷子片皮鴨超高質，鴨皮烤到好香脆，配菜同普通片皮鴨唔同，有金奇異果同埋哈密瓜，盡顯高級。麻辣菜色方面亦都好出色，有涼拌泡椒小龍蝦米線、剁椒酸辣羊肉、剁椒酸菜走香黑白切同埋辣子鵪鶉，每一道菜都調配咗獨特嘅麻香，岩哂鍾意食辣嘅朋友。仲有好養生嘅燉湯，黑蒜螺頭雪蓮子燉班骨唐排勁足料。最後，食埋碗雜果土紅糖冰粉同埋生果作結尾，非常完美。呢碗紅糖冰粉加咗啲果仁同埋多款高級生果，係我人生食過最好味嘅冰粉！