御泰坊-泰越菜 (裝修中)

今晚我們喺觀塘apm睇完戲之後去咗「御泰坊-泰越菜」食晚飯！我們叫咗海南鷄「半隻」一嚟到嗰陣就覺得同平日食開嘅唔同，因隻鷄係即時用啲鷄湯淋熱，之後就攞出嚟畀我們，所以肉質非常「硬實實」，而且相當「粗嚡」，真係令我們覺得超級失望呀！蒜蓉牛油泰式鷄翼炸得好金黃香脆，而且係將啲鷄翼剪開成單骨，雖然係食落會係比較方便，但份量相對就少咗！越南生牛肉湯河粉同越南鷄絲扎肉湯河粉一開始喺落單嗰陣我們同店員要求話要多湯，同埋要啲湯熱啲，但出到嚟，啲湯仲比正常嘅少咗，就連隔離檯見到都話：「嘩！點解咁少湯？」所以我們就問店員再加返多啲湯，但店員就喺「黑口黑面」同好唔願意之下攞畀我們，而且態度仲要非常差劣，真係有種「貼錢買難受」嘅感覺！燒牛扒配糯米飯青檸辣椒汁係咁多樣嘢食之中最好嘅，因牛扒嘅肉質相當鬆軟，肉味亦非常濃郁，糯米飯嘅質感好煙煙韌韌，用啲生菜包著嚟食，感覺好清新同唔會有好油膩嘅感覺，不過最值得一讚嘅係呢個醬汁，味道超惹味醒胃同令我們回味無窮！