阿爺八鮮鍋 (已結業)

每次經過登打士街都會見到大大塊牌寫住「阿爺八鮮鍋」，都見有唔少人介紹過，令我都想試好耐。前幾日夜晚就同朋友一齊黎左呢到dinner啦。雖然都要三百幾蚊一位，但都真係有好多野食。首先一開始就每位有一碗燉湯，味道濃郁，好味。之後就係時令刺身拼盤，呢到嘅二人份量都真係多到嚇親，仲要唔係求求其其俾啲三文魚刺身就算。刺身食落都幾鮮美，完全係食刺身都食到回本。之後有花膠年糕雞煲，花膠份量比得一啲都唔孤寒，每塊都大大塊，仲應該有成七八塊。年糕住得軟淋，索晒雞煲味，好好味。雞亦都好嫩滑。食完雞煲之後就到打邊爐啦。每日嘅湯底都唔同，會有兩款。嗰日係蝦米湯同番茄湯，咁我兩款都想食，就揀左鴛鴦湯底啦。番茄湯味道會清淡少少，蝦米湯就香濃嘅蝦米味，兩樣配搭就啱啱好。火鍋配料唔洗自己出去夾，落單叫就有啦。一般正常嘅火鍋配料呢到都有嘅，不過呢到仲有好多款海鮮任叫，例如鮑魚、蟹、龍躉頭腩、生蠔同埋花膠等，完全係回本之選。咁抵食，難怪全間餐廳咁多張檯，都每檯坐滿曬。