同一餐室 (已結業)

係土瓜灣區幫襯過不少粉麵店，無一間滿意! 我要求牛腩係五香啫，牛筋炆得夠冧啫，想食碟南乳豬手炆得夠冧夠入味啫，都唔好睇價錢.蘇記，七喜，金苑，肥仔記，通通唔合格，一係牛腩牛筋唔夠冧，一係坐得唔舒服冷氣不足服務差，潮式嘅味道又唔係我杯茶，所以潮豐唔會選擇，唯有行遠D，行去譚公道果邊覓食.經過哩間叫同一，店舖門面比較細而從未幫襯過，於是推門入去睇睇.點咗碗筋腩河多蔥，女友小熊點咗四寶河，再加淨豬手一碟.優點:1, 冷氣夠凍.2, 環境光猛乾淨.3, 湯底清甜.4, 牛筋夠冧夠入味! 冧到無牙阿婆都食到! 滿意! 牛腩好奇怪，質感一舊舊硬實實，食佢要技巧，細細啖食反而口感鬆軟得多.5, 四寶丸有魚蛋，豬肉丸，魚皮餃同墨丸，我只係食咗豬肉丸， size 比起街有賣嘅豬肉丸細粒，但口感鬆軟.6, 豬手同樣夠冧夠入味! 份量足無偷工減料，正! 推介!7, 好鬼憎掃曲落單! 想多蔥多腩汁，哩D要求總係無得俾你揀，但係同一嘅掃曲有得揀喎! 咁咪窩心囉!8, 要求多蔥真係俾多蔥，服務算係咁啦！缺點:1, 店舖唔大，坐得唔係太舒服.2, 價錢唔算抵.同一唔算一間好正嘅粉麵店，只係對手太弱，所以顯得出色.